sivasiva.org |
This page in Tamil Hindi/Sanskrit Telugu Malayalam Bengali Kannada English ITRANS Marati Gujarathi Oriya Singala Tibetian Thai Japanese Urdu Cyrillic/Russian
Selected thirumurai | thirumurai Thalangal | All thirumurai Songs |
Thirumurai |
2.117
திருஞானசம்பந்த சுவாமிகள்
திருக்கடைக்காப்பு
மண்டு கங்கை சடையில் கரந்தும், செவ்வழி (திருஇரும்பைமாகாளம் மாகாளேசுவரர் குயிலம்மை) Audio: https://www.youtube.com/watch?v=TJPLRSQLiNc Audio: https://www.sivasiva.org/audio/2.117 Mandu Gangai.mp3 |
Back to Top
திருஞானசம்பந்த சுவாமிகள் திருக்கடைக்காப்பு
2.117  
மண்டு கங்கை சடையில் கரந்தும்,
பண் - செவ்வழி (திருத்தலம் திருஇரும்பைமாகாளம் ; (திருத்தலம் அருள்தரு குயிலம்மை உடனுறை அருள்மிகு மாகாளேசுவரர் திருவடிகள் போற்றி )
மண்டு கங்கை சடையில் கரந்தும், மதி சூடி, மான் கொண்ட கையான், புரம் மூன்று எரித்த குழகன்(ன்), இடம் எண்திசையும் புகழ் போய் விளங்கும் இரும்பைதனுள், வண்டு கீதம் முரல் பொழில் சுலாய் நின்ற மாகாளமே. | [1] |
வேதவித்தாய், வெள்ளை நீறு பூசி, வினை ஆயின கோது வித்தா, நீறு எழக் கொடி மா மதில் ஆயின, ஏத வித்து ஆயின தீர்க்கும்(ம்) இடம்(ம்) இரும்பைதனுள், மா தவத்தோர் மறையோர் தொழ நின்ற மாகாளமே. | [2] |
வெந்த நீறும் எலும்பும் அணிந்த விடை ஊர்தியான், எந்தைபெம்மான் இடம் எழில் கொள் சோலை இரும்பைதனுள் கந்தம் ஆய பலவின் கனிகள் கமழும் பொழில் மந்தி ஏறிக் கொணர்ந்து உண்டு உகள்கின்ற மாகாளமே. | [3] |
நஞ்சு கண்டத்து அடக்கி(ந்), நடுங்கும் மலையான்மகள் அஞ்ச, வேழம் உரித்த பெருமான் அமரும்(ம்) இடம் எஞ்சல் இல்லாப் புகழ் போய் விளங்கும்(ம்) இரும்பைதனுள், மஞ்சில் ஓங்கும் பொழில் சூழ்ந்து அழகு ஆய மாகாளமே. | [4] |
பூசும் மாசு இல் பொடியான், விடையான், பொருப்பன்மகள் கூச ஆனை உரித்த பெருமான், குறைவெண்மதி ஈசன், எங்கள்(ள்) இறைவன், இடம்போல் இரும்பைதனுள், மாசு இலோர் கள்மலர்கொண்டு அணிகின்ற மாகாளமே. | [5] |
குறைவது ஆய குளிர்திங்கள் சூடிக் குனித்தான், வினை பறைவது ஆக்கும் பரமன், பகவன், பரந்த சடை இறைவன், எங்கள் பெருமான், இடம்போல் இரும்பைதனுள், மறைகள் வல்லார் வணங்கித் தொழுகின்ற மாகாளமே. | [6] |
பொங்கு செங்கண்(ண்) அரவும் மதியும் புரிபுன்சடைத் தங்கவைத்த பெருமான் என நின்றவர் தாழ்வு இடம் எங்கும் இச்சை அமர்ந்தான் இடம்போல் இரும்பைதனுள், மங்குல் தோயும் பொழில் சூழ்ந்து அழகு ஆய மாகாளமே. | [7] |
நட்டத்தோடு நரி ஆடு கானத்து எரி ஆடுவான், அட்டமூர்த்தி, அழல் போல் உருவன்(ன்), அழகு ஆகவே இட்டம் ஆக இருக்கும்(ம்) இடம்போல் இரும்பைதனுள், வட்டம் சூழ்ந்து பணிவார் பிணி தீர்க்கும் மாகாளமே. | [8] |
அட்ட காலன் தனை வவ்வினான், அவ் அரக்கன் முடி எட்டும் மற்றும் இருபத்திரண்டும்(ம்) இற ஊன்றினான், இட்டம் ஆக இருப்பான் அவன்போல் இரும்பைதனுள், மட்டு வார்ந்த பொழில் சூழ்ந்து எழில் ஆரும் மாகாளமே. | [9] |
அரவம் ஆர்த்து, அன்று, அனல் அங்கை ஏந்தி, அடியும் முடி பிரமன் மாலும்(ம்) அறியாமை நின்ற பெரியோன் இடம் குரவம் ஆரும் பொழில் குயில்கள் சேரும்(ம்) இரும்பைதனுள், மருவி வானோர் மறையோர் தொழுகின்ற மாகாளமே. | [10] |
எந்தை பெம்மான் இடம், எழில் கொள் சோலை இரும்பைதனுள் மந்தம் ஆய பொழில் சூழ்ந்து அழகு ஆரும் மாகாளத்தில், அந்தம் இல்லா அனல் ஆடுவானை, அணி ஞானசம் பந்தன் சொன்ன தமிழ் பாட வல்லார் பழி போகுமே. | [11] |